Монгол Улс 2023 оны байдлаар Цахим засаглалын индексээр дэлхийн 193 улсын 74-т жагсаж байна. Улаанбаатар хотын 85.3 хувь нь интернэт ашигладаг хэдий ч интернэтийг зөв зохистой, аюулгүй, үр ашигтай ашиглахад цахим ур чадвартай иргэд дутагдаж байгаа нь:

1. Үндэсний Статистикийн хороо, Харилцаа холбоо, мэдээллийн технологийн газрын хамтран хэрэгжүүлсэн “Өрхийн болон хувь хүний мэдээлэл, харилцаа холбоо, технологийн хэрэглээ, 2021”;
2. НҮБ-ын Хөгжлийн хөтөлбөрийн Хурдасгуур Лаборатори “Зорилтот бүлгийн иргэдийн цахим ур чадварыг үнэлэх чанарын судалгаа, 2021”;
3. НҮБ-ын Хөгжлийн Хөтөлбөрийн дэргэдэх Хурдасгуур Лаборатори нэгжийн захиалгаар БШУЯ-ны харьяа Боловсролын судалгааны үндэсний хүрээлэнгээс хийгдсэн “Иргэдийн цахим ур чадварын хэрэгцээ тодорхойлох судалгаа, 2022” судалгаанаас харагдсан.

Иймд бүх нийтийн цахим ур чадварын бодлогын баримт бичгийн хэрэгжилтийн хүрээнд цахим шилжилтийн бэлэн байдлыг хангах, бүх нийтийн мэдээлэл, харилцаа холбоо, технологийн мэдлэг, ур чадварыг дээшлүүлэх сургалтыг иргэд, төрийн албан хаагчдад зохион байгуулж, 1000 сургагч багш бэлтгэх, тоон хуваагдлыг бууруулах, Төрийн үйлчилгээний нэгдсэн E-Mongolia системийн үйлчилгээг хүргэх зорилгоор “И-Монгол академи” УТҮГ нийслэлийн 9 дүүргийн иргэд, төрийн албан хаагчдад 2024 оны 04 дүгээр сарын 23-ны өдрөөс 07 дугаар сарын 10-ны өдрийг хүртэл цахим ур чадварын аяны I үеийг амжилттай зохион байгууллаа.